ودع محمد نـــور ليجهز نفسه للسفر لخطبتها من عمه
بدأ مشوار محمد بالليل ومرت الساعات حتى وصل للقصر العظيم "قصر عمه" ابو نور
محمد:
دخل عمي وهو يطالعني بنظرات غريبه وقال: أنت؟؟ قلت : ايه أنا محمد ولد أخوك المدفون تحت تربته
ماعندي أخو!!! جم مره أنا أكررها لكم؟؟ وإن مات الله يرحمه
في البدايه لمحت بعيونه نظرة حزن..لكن تراجعت وحلت مكانها نظره بلا معنى..حسيت انه في لحظه تأثر
عمي أنا أبيك في طلب..؟؟؟
قول اللي عندك أنا وقتي ثمين
تذكرت هالجمله سمعتها من قبل بس ماكنت بروحي كان ابوي معاي..والحين وينه.. توفى وانا اواجه العملاق بروحي..
تبي سياره؟؟ بيت؟؟ وظيفه؟؟
قول أنا أحب أتصدق أعمل الخير!!!؟؟
بعد كلامه تمنيت اني أصرخ بوجهه وأقول: أنسان بلا مشاعر..جبل من القسوه والجمود
أنا بخير ونعمه مو ناقصني شي..
طالع فيني بأستغراب!! أجل طلبك شنو يكون؟؟
قلت : نـــور هذا هو طلبي
أبي أتزوجها بعد أذنك
شفت بعيونه استحقار العالم كله.. ومن تكون لجل تطلب نـــور ؟؟
جـرحـنـي.. ذلـنـي.. هـزأنـي..وبالنهايه.. طـردنـي
رجعت لديرتي..كيف..وشلون..مادري
وتيلفوني طول الطريق تتردد نغماته.. آه يا نــور أنكتب علي أعيش بدونك
دخلت البيت وأنا منهار..ضايع بين عبراتي.. وبحور آلامي
أستمريت على هالحال أسبوعين..شهر
وصلتني رسالة من نـــور
" وين الوعد يا خاين العهود"
" أنا بدونك دنياي بلا مرسى"
تنهدت وقلت بداخلي: شلون قسيت عليها؟؟
دقيت على تيلفونها.. ردت علي واهي تبجي وتردد..وينك عني؟؟
محمد ليه تجافيني؟؟ وين الوعد؟؟
بجيت معها وأختلط دمعي بدمعها.. نـــور أحرموني منج.. أبعدوني عنج.. نــور ذبحوا قلبي.. وحفروا قبري
نـــور أبكي ولا أكتم بصدري آهاتي؟؟
أشكي ولا أعالج شكواي بصمتي؟؟
أنا هويتك والشاهد خالقني..
لكن حكم علينا أبوج بحكمه الظالم
وأنا عند الوعد يا نــور..ما أتركج لو تنهد جبال..او أن السما تقبل الأرض
حاولنا ننسى همنا.. وأعيش معاها مثل أول.. أعيش على صوتها وحبها..
حاولت مع عمي.. وكررت محاولاتي..وأرسلت من يتوسط لي عند السيد العظيم
لكنه كان جدار مايهتز.. وعنيد مثل الصخر
ماعندنا حل ألا إنا نتناسا هالأبو الظالم ونعيش حياتنا مثل أول
وفي يوم كلمتني نـــور ونوحها يسابق كلامها!!!
نـــور يانــــور العين شفيج؟؟؟
محمد ربي أستجاب لدعائي
شتقولين؟؟ عمي وافق نتزوج؟؟
لاااااا يا محمد أنت تعرف مستحيل يوافق
زين شنو اللجديد؟؟
اليوم عندي عيد !!!
محمد تماسك واسمعني عدل !!!
اليوم كنت بالمستشفى اسوي تحاليل من تعب كنت اشتكيه من أيام وطلعت النتيجه !!!
أنا يا محمد
نــــور تكلمي
يكفيني مافيني
أنـــا مريضه بالــسرطــان
والطبيب يقول حالتي صعبه و وصلت للشي للحرج
جمووود.. وصمت... وذهووووول
حسيت بعمري كبر 100 سنه
وأنا أحاول أسمعها... واللي قاهرني تردد وتقول ربي أستجاب لدعائي
يامحمد لاتحزن.. أفرح.. هذا الشي اللي أنا أبيه وأتمناه
محمد دنياي من غيرك مابيها.. الموت أهون علي ولا أعيش مع أنسان غيرك
أنا أبجي.. وأبجي.. ودمعي سيول.. وأهي مستانسه بالمرض
وشوي أسمع عند نـــور صوت ثاني..صوت مصدوم وماهو مصدق..كأنه صوت الجبل والعم الظالم
سكرت الخط .. وأنا في حيرتي.. مو مصدق.. أتذكر كلماتها
أفرح
يامحمد
ولاتحزن
غـبـيـه .. شلون أفرح وأهي من حياتي تروح؟؟
شلون الهنا والسعاده أعرف دربها وأهي بعيده عني؟؟
ياكثر الآهات اللي بقلبي تلوع
والهموم اللي بصدري تلوع
بعد أيام وصلني خبر سفر نـــور للخارج للعلاج مع العم المبجل الكريم
وانا أنتظر.. وأنتظر.. والأنتظار يحرق قلبي ويحرق مافيني من حياة
فكرت أجمع ما أملك وأسافر لعمري وحياتي أقضي معاها أيام العلاج
وكبرت الفكره في راسي وفعلآ ماكملت غير شهر الا وانا هناك عند نـــور حلمي الأول والأخير
وقفت عند باب غرفتها.. كان ودي أدخل بكل لهفه وشووووق وأضمها وأبجي بأحضانها
بس خفت من العم
طرقت الباب.. أنفتح الباب.. وطل منه وجه عمي.. شفته حالته عجيبه.. مو عمي اللي أعرفه
كان الدمع بعيوني كاتم على انفاسي.. عيوني اللي ترجاه أشوف نـــور
ومن دون ما أتكلم.. قال : تفضل يا ولدي
ماكنت مصدق.. بس المهم وافق
دخلت لملاكي
وأنا أجر خطواتي
هناك على السرير الأبيض.. ترقد أماني عمري.. والتعب أنهكها وبانت ملامحه عليها
ضميت يدها بيدي وكررت العهد على سمعها
ورفعت راسي لعمي.. وقلت زوجني نــــور
أنصدم من موقفي .. للحين تبيها وأهي ميته أصلآ؟؟
قلت : العمر اللي باجيلها بيكون أحلى عمر عشته
وافق عمي وقال اللي تبيه يصير
تبسمت نــــور بوهن.. وتبسمت لها.. وحسيت بأول أفراح حياتي
تم كل شي بسرعة البرق.. تزوجتها.. وهي على فراش المرض
أحتفلت بيوم عيدي معها بالمستشفى الكبير.. الأطباء والممرضات الأجانب..سمحنا لهم بالأحتفال معنا
الكل هناك يحب نــــور
بقيت معاها وأنا أصبرها على المرض ونحلم في بيتنا وسعادتنا
وصار المستشفى الكبير يردد حب محمد ونــــور
وفي منتصف ليله من الليالي.. وأنا عند نـــور سهران
سمعتها تصرخ بصوت عااااالي وهي تتقلب على فراش المرض..ومن الألم أنينها قطع قلبي
طلعت من الغرفه مثل المجنون.. أنادي الدكاتره والممرضات..الكل من حولي يركض..ويدخل الغرفه
وصراخ نــــور يتردد صداه بمسمعي
جلست أبجي في زاويه مثل طفل صغير..فقد أمه بظلمت الليل..
وشوي شوي أسمع صراخها يهدى
رفعت راسي والدكتور يطالع في عيوني
أدخل لنــــور تحتاجك
دخلت وأنا كلي تعب.. منهمك.. الحمدلله حالة الخطر زالت
بس شكل نـــور مو عاجبني.. يارب ارحمني من العذاب اللي اعيشه عالبطئ
وأرحم نـــور من آلامها المستمره
وقفت عندها.. تبسمت في وجهي وقالت تعال عندي العوار خلاص راح.. برتاح الحين
لا تبجي وأمسح دموعك.. قلت: ما أبجي أنا أنتي أرتاحي الحين
محمد تدري أني ندمت على دعواي ورجاي؟؟
ماكنت أدري أني بضمك ويتحقق حلمي ومناي..قاطعتها.. نـــور لا تكملين..نامي أنتي الحين وأنشالله باجر نتكلم على كل شي
محمد أنا أشوف الموت.. أشوفه يناديني
قلتلها يومي وعمري قبلج أنشالله .. أنتي راح تطلعين ولا نسيتي حلمنا.. نسيتي بيتنا.. نسيتي ولدنا مشاري
راح أعيش معاج العمر كله لأني أحبج وأحبج وأحبج
أنا بعد يا محمد أحبك .. بس أنتبه لنفسك.. وعيش دنياك بحب نـــور
لاتـــنــــسى ذكــــراي
سمعتها تنطق بالشهاده وترددها
لا تكفين نـــور لاتخليني والله أموت معاج
بعدها أنفاسها ما سمعتها
حركتها.. طاحت ايدها مني !!! راحت نــــور
صرخت صرخة الجريح المحروم
نـــــــــــــــــــــــــور
ناديت لكن حكم القدر أخذ مني روحي
رددت الوعد
" نـــور أنا لك حياة وممات"
وهذا أنا عايش أداوي بعدي وحرماني عن نــــور
العاشق الخسران
تذكرتك وأنا الطير الجريح مفارق الخلان
ونار البعد وفراقك تعل أقصى شراييني
أبي أعرف في غيابك ليه شوفي يمتلي دخان
وأحس أني لحالي وأقرب أصحابي حواليني
حبيبي رحت عني راضي ولا أنت زعلان
يا ليتك قلتلي قبل الفراق أنك مخليني
رحت وغابت الفرحه ورى ليل من الحرمان
ورجعت لصوتك اللي كان يملا الكون يدعيني
أثر نار الفراق صلفه دخيلك يا عظيم الشان
أنا ما عاد لي شوف على الفرقى يقديني
بعد فرقاك عشت الجرح عمر العاشق الشفقان
على باب العمر لامر لك طاري يبكيني
حبيبي تعب عيوني السهر من عاشق سهران
تعبت وطال بعدك والعمر ماعاد يمديني
غرب ضي الأمل قبل الشروق وسادت الأحزان
دروب العمر تسرق فرحتي والحزن يطويني
أنا مثل الغريق وطاري الذكرى مثل الطوفان
تزيد الجروح في قلبي وتبعدني وتدنيني
تعبت ومركبي مل السفر وضاقت به الشطآن
ولا لي غير حبك ساحل يمكن يرسيني
حصدت الدمع محصول الفراق ولوعة الهجران
إلا مني ذكرتك غرق كفوفي مطر عيني
بعد ماغرق عمري فالحزن ضاقت بي البلدان
وشفت الموت في كل الدروب وقلت أنا ويني
أنا مليت..مليت العذاب وقلبي المليان
بهم صاب من هجر الحبايب مقتل سنيني
يأست من الفرح في موسم فيه الأمل كسلان
رفعت الرايه البيضا لحزني وأرتمى فيني
عرفت أني بعد فوت الأوان العاشق الخسران
ودريت أن أصدق وعود الهوى ماعاد ترويني
رجعت بحسرتي كلي جروح مكسر الجنحان
وسال الجرح دم وشفت وجهك في شراييني
هناك ٢٩ تعليقًا:
نهايه حزينه ونفس الوقت حلوه لان فيها معاني الحب الصادق والعشق اللانهائي من الطرفين ,,,,
الله يرحم نور والله يرحم هالقلب الي تحمل هالمآسي قصه روعه ونهايه اروع غير متوقعه دمجتي نهايتين بنهايه وحده وحلوه ,,,
حب صادق وانساني ,الله يعطيج العافيه يالغاليه على القصه الرائعه وتسلم ايدج بس الحين انا راح احن على الموضوع الي بعده:)
بس اسم مشاري موراكب مع محمد انا اتوقع اسم الولد اهو الي اثر بالقصه الله يعين,,,
عبدالله الظفيري:
يا هلا وغلا والله :)
صراحه أشكرك جدآ على تواجدك الدائم معاي ^_^
يعجبني اسلوبك عبووود وكلامك روعه نابع من احساس مرهف متفهم لجميع المعاني..
كان هدفي من القصه هو تخليد معنى الحب السامي..
الحب اللي ما يتأثر من العوامل الخارجيه..
أو الظروف المفاجئه..
عدم التخلي عن الطرف الآخر في الوقت اللي يحتاج فيه لمساعدتنا..
وهذا شفناه مع محمد على الرغم من انه عرف ان نور ماراح تستمر معاه إلا أنه تزوجها واهي تصارع الموت..
بالنهايه اهي قصه اتمنى الكل يستفيد منها ويفهم شنو اللي ابي اوصله..
وبعدين أسم مشاري والله طلع معاي بسرعه بدون لا أخطط له لقيت نفسي أكتب مشاري قلت خلاص ماراح أغيره :)
والموضوع الثاني الله يهداك عبود توه الأول حتى محد علق عليه أنطر علي شويه ^_^
مشكوووور عبدالله وماتقصر على تواصلك معاي ^_*
حصدت الدمع محصول الفراق ولوعة الهجران
إلا مني ذكرتك غرق كفوفي مطر عيني
هني خلاصة القصه
barrak:
ياهلا بالغالي..
حياك الله..
تصدق كنت بكتب البيت هذا بلون مختلف لأنه جد مأثر فيني..
بس الله يعطيك العافيه ابرزته لي الحين :)
مشكور براك على التواصل الجميل منك
تحياتي :))))))))))
السلام عليكم ورحمة الله
يا امبراطورة ما هذا الابداع اغرقتى دمعنا وانسالت العبرات تحفر على الوجنات حفرا غائرة لا يدويها الا الرضا يقدر الله
اللهم اجعلنا راضين بحكمك وقضاءك
تحياتى
أقول مسا الابداع...حرام وشويه عليج
مساالنهايات السعيده والحزينه بنفس الوقت
هم شويه
تدرين لو مهما قلت ماراح أوفيج حقج
لاني شهادتي فيج مجروحه
وتدرين بهالشي
قلبي تقطع وانا أقرا هالسطور الغاليه
والنهاية والله يعين محمد بعد فرقا نور ويرحمها آمين
فعلا الحب شي عظيم ونادر وجوده بهالزمن المرير اللي نعيشه
بس الوفا اللي من هالنوع كلنا نقف له تحية واجلال
لانه صعب يتواجد بهالزمان
الله يطول بعمرج...ويخليج لي غاليه وعزيزه...ويخلي قلمج يشع ابداعات اكثر وأكثر
دمت بحب ودفء يالامبراطوره
:)))))))))
مساء الخير امبراطورة
عقب هذا السيل من المشاعر والعبرات
مالنا الا ان نهنيج وانهني انفسنا
على هذا الاحساس المرهف وهذا التألق
الطائر الحزين:
مرحبا مليون بالغالي..
صدقني الدمعات عندما تسيل ممكن انها تخفف من آلامنا شويه..
وسالت دمعاتي قبل دمعاتك..
الله يرحم الجميع :)
مشكور عزيزي على مرورك ^_^
فراوله:
اهلين وسهلين شو هالزين يخزي العين ^_^
يا هلا ومرحب باللي لفانا :)
تخجليني كلما قرأت تعليقاتج ..
وكلماتج تعطيني دعم نفسي للأستمرار.. اتمنى انها تستمر نعاي..
وسلامة قلبج اتمنى اني ماقطعته :)
اهم شي ان نور تحقق حلمها مع محمد..
وهذا يبين لنا مدى اهمية الحب الحقيقي اللي يستمر على الرغم من المخاطر والصعوبات اللي نواجها في حياتنا..
ونور ومحمد جسدوا لنا معاني الحب الساميه ومعاني الوفاء بين قلبين احبا بعضهما رغم وجود النهايه واضحه امام اعينهما وهو المرض..
مشكوره فراولتي اللذيذه على اسلوبج الراقي في التعليق ^_^
ودمتي لي ابدآ ^_*
SolaimaN:
صبح الحب والأحساس الرائع..
أنا أهني نفسي على تواجدك معاي وأن كلماتي لقت صدى وأستحسان منك..
أشكرك جزيل الشكر على تواصلك معاي :)
ودمت لي معلقآ رائعآ ^_*
الأستاذ بلاليط:
هلا بأستاذي الغالي حياك الله..
يشرفني وجود شي كتبته يلاقي استحسانك أستاذي..
اشكر مرورك الكريم وتواجدك معاي:)
مدونة رائعة
وبوست رائع
واللي كاتبتة اروع
يعطيج الف عافية استمعت بزيارتي لمدونتك الراقية مثل صاحبتها..
عورتي قلبي ياالامبراطورة
أنين القصة خلت دموعي تنزل بكل سطر أقراه
الامبراطورة
بكل صراحة ومن دون مجاملة
أروع كاتبه قصصية
وفنانة بدمج الأحداث وكتابة الشعر
إنتي
الله يبارك لج بهالقلم الماسي
مبدعة بكل معنى الكلمة
ومن الحين اقول لج
شوقتيني لقراءة جديدج
دمتي مميزة دوم
والله هالولد مسكين ومدقور وله اجره لو كانت القصة واقعية ابوه وبعدين مرته
يعطيج العافية وقصة فعلا خلتنى اعيش معاهم
مشكورة
كنت قاعد اشوفهم وانا اقرا القصه
لي هالدرجه والله
مشكوره امتعتيني
ولو انها مؤلمه
عاليه:
هلا ومرحبا بالضيفه الجديده..
حياج الله :)
يسعدني ويشرفني مرورج على مدونتي المتواضعه واتمنى يستمر هالمرور..
شكرآ غاليتي على الكلام الحلو ^_^
تحيااااتي :)))))))))))
Aldenya:
أسم الله على قلبج..
وفديت الدموع والله اشتريها بالغالي بس ماتنزل ..
والإبداع حبيبتي تعلمته منج ومن الموجودين لولاكم ماصرت اليوم بينكم ..
"العين ماتعلى عالحاجب"
وانشالله الجديد يرضيكم ^_^
دمتي لي عزيزتي ^_^
Mishari:
حيالله الغالي نورتنا والله ^_^
اهي قصه خياليه..
وصدقني الواقع فيه اكثر منها ..
بس مانقول ألا الله كريم يهون على عباده ..
تحياتي عزيزي :)
MANAF :
مرحبا وأهلين بكامل الزين ^_*
فديت الأحساس اللي صور قصتي جدامه ^_^
وانشالله ماتشوف آلام في حياتك عزيزي :)
يسعدني وجودك معاي :))))))))
عورتي قلبي بآخر الليل والله ..
قصة رائعة جدا خيتو ..
وكلمات ادمت قلبي قبل عيني ..
أحيي قلمج :)
لاتحرمينا =)
عيون الحب:
يا هلا ومرحبا ..
مساج الله بالخير غاليتي..
تسلميلي عالزياره الحلوه مثلج وحياج لاتقاطعينا ^_^
أشكر مرورج الكريم :)))))))))
يقولج الحزن على الميت بس ثلاث ايام الحين صارلنا اكثر من ثلاث ايام وين الموضوع الجديد؟؟
بالتوفيق
لييش هالنهاية
امبي دمعتي بعيوني
حدي حدي حبيت القصة ونهايتها فيها كل معاني الحب
انتظر قصتج الياية
بس ابي نهاية تفرح القلب
عبدالله الظفيري:
هلا بالغالي والله..
أبشر أنشالله اليوم انزله :)
SHAHA:
فديت عيونج والله وابشري انشالله الموضوع الثاني يعجبج ^_^
مشكوره حبيبتي عالزياره ^_*
صباح الخير يالغاليه :)
شلونج وشخبارج عسا ماشر مالج حس مسافره والا شنو ؟؟
وين الموضوووع وعد الحر دين الا اذا تبين توفين بوعدج بتذاكر سفر للجميع شي حلو انا واحد راضي بهالشي :)
بالتوفيق طمنينا عليج
صباح الضحى ..
اوف حرااام :( خلص الكلينكس قمت امسح دموعي بهدوومي
هيجتي مشاعر الحزن في قلبيي
و تسلمين يا مبدعة
Shather:
اسم الله يا شذر ترى دموعج غاليه ياغاليه ^_*
تسلميلي انتي عزيزتي :)))
إرسال تعليق