ذبابه توفيت من غير ذنب :(
صج قصة غريبة بس كتبتها اليوم وأبي أهدي البوست هذا لبنت أختي وحبيبتي وروحي
ريــوووومـــه
هذا أول يوم لنا بالقاهره.. قالت ريم نبي نطلع قلتلها من صجج !! اليوم راحه ماكو طلعه
المهم من باجر قمنا نتكشخ نستعد للطلعه وقعدت بغرفتي وطبعآ ريم معاي ملاومتني وين ماروح لأنها حبيبتي
قعدت بالغرفه على المرايه عشان اتمكيج.. وريم يمي كالعاده بس هالمره كان معانا طرف ثالث حده مزعج بالنسبه لريم
الطرف الثالث كانت الذبانه "الذبابه" تفتر فوقنا وكله تحط عالمرايه كنها حالفه ماتروح لأي مكان
ريم تضايقة منها وانا اضحك اقولها حرام اتركيها البنت تبي تتمكيج مثلنا تبي تطلع تسهر معانا
وريم مو ريضيه تبي تذبحها تقول يا أنا يا الذبانه هذه اليوم
فقامت ريم تدور اي وسيلة لقتل الذبابه المسكينه مالقت الا انها ترسل الشغاله للبقاله تحت وتشتري المضرب وفعلآ جابته الشغاله
وتحقق حلم رين وقتلت الذبابه بغفله منها عندما كانت تتمكيج معاي :(
قلت لريم حرام عليج الحين وراها عيال راح يسألون وين امنا وراح ينطرونها وانتي حرمتيهم من امهم
بقولكم شغله عن ريم.. عمرها 13 سنه وحساسه لأبعد درجه يعني أي كلمه تنزل دمعتها سيدا
فأنا أستغليت الموقف وقلت لو أنها أمج يا ريم ترضين أحد ياخذها منج؟؟
قالت لأ أذبحه
قلت خلاص أنتي الحين حرمتي عائله من أمهم
هذه الأم ياريم حرام عليج والله حرام
ولما حسيت أن دمعت ريم خلاص موقادره عينها تشيلها وراح تنزل
ولا فيه ذبانه ثانيه
قلت ريم بسرعه هذا زوجها جانا يبي ينتقم منا
جان تقعد ريم وتضحك :))
قلت الله يعيني الحين عباله ان أنا اللي ذبحتها وراح ينتقم مني بس مالي شغل بقول أنتي اللي ذبحتيها
قالت خلاص إذا قال ليش حوليه عندي وأنا أتصرف معاه أخليه بسرعه يروح يلحق مرته :))
بعد فتره من الصمت قالت ريم: خاله ليش ماتكتبين قصيده عن الذبانه وموقف زوجها منا؟؟
عشان جذي اول مره بحياتي أكتب قصيده عن حشره بس كله لخاطر ريوووومه أتمنى أنها تعجبها وتعجبكم أنتم قرائي
وتعطوني رايكم فيها ^_^
القصيده بيني انا والذبابه وزوجها
الذبابه
عزي لقلب أبد ماكمل الحول
يجزاه من لوعات روحي الجبانه
ياذالبشر ماني أنا وحش أو غول
ولا الزير سالم يوم أمسى بحانه
أصلي ذبابه وأن تعديت مسؤل
الله خلق خلقه وأحسن بنانه
الثار حق وقاتل النفس مقتول
والزير صانه وأمرؤ القيس صانه
زوجــهــــــــــــا
وهذه ذبابه تنتخي فيا وتقول
يابو عيالي لاتخلي تهانه
لا لاتصالح تترك الثار مهبول
وتصفق كفوفك وتلتفت للخيانه
ماتطيب لي خمره وذالسيف مسلول
يحرم عليه الغمد للشان شانه
لا واحياتي عقبها مالها جول
لين آخذ بثاري أو ألحق بنانه
واعيني اللي لم ترى مثلها زول
لو لم يحلق في سمايا ريانه
معجل الجنحان فارع الرمش والطول
محدب الأعضاء والذيل ثانه
وهوكر صوته لافت الناس بذهول
خلاص كافي ماتحمل إهانه
أنـــــــــــــــا
لحظه تريت وأسمع الهرج والقول
أنا الإمبراطوره ولو تبي الثار عانه
محد أخذ ثاره بلا علم معجول
كن عنده حصانه ومالي حصانه
كنا ثلاثة مابنا حد معذول
وكنا نتزين في امان الله أمانه
أنا والذبابه وهذه الريم الجفول
على المرايه وللذبابه شطانه
ماتحملت ريما حركات مخبول
قامت بسرعه تسحب سلاح فانه
معرف المصنع ماسك يديه مفتول
عنده لياقه وللمرانه مرانه
كانك تبي شوفه فأنا أقول مسطول
أبد تدور للمآسي عزانه
وأنت تبي ثارك؟؟ لحول لحول
عليك في ريما تزيد الأهانه
وهذا كلامي وكثرة الهرج بتزول
والزين من يعرف لسانه حصانه
هناك ٢٩ تعليقًا:
اول المعلقين :)
صباح الخير هذا اول يوم لكم لا بالله خير ووناسه وغير الي وداج ملهى والله رحنا وطي ,,,
وين القصيده ؟؟
الحشره كائن حي وله حق علينا نواسيه كتبي افا عليج :)
زين نزلتي موضوع:)
الحمدلله على السلامه
وصج الذبانه راحت وراحت ايامها :) بعد ان قتلت على يد ريم
شعر حلو وجميل من وحده مبدعه
عبدالله الظفيري:
اهلين يامرحبا بالغالي
شفت شلون اجتمعوا علي الذبابه والملهى :)))
بس الحمدلله وناسه في وناسه
انا نزلت الموضوع بس انت كمل موضوعك
تسلملي يالغالي
^_*
Shaima'a Alkandari:
مرحبتين ياكامل الزين
هلا باللي لفانا يا هلا
شيووومه حبيبتي انتي الحلى كله ياقلبي
الله يسلمج ويخليج لعين ترجيج يالغاليه
والله يسامح ريم جان خلتها تكمل لبسها وتمكيجها وتطلع معانا هم اهي لها نفس :))
مشكوره حبيبتي عالزياره فديتج ^_*
أهلاااااا باحلى امبراطورة
القصة حدها ضحكتني .. بس واعليه على الذبانة تكسر الخاطر
بس يللا هذا يومها
والقصيدة ماشاء الله عليج .. روعة
ترى اشتقنالج والله
مساالورد والجوري
مساالغالين..اللي رجعتهم سرت الخاطر والعين
غاليتي امبراطوة اشعاري
الف الحمدلله علي السلامة..وانشاءالله استانستي بالاجازة
:)
وصج سالفة الذبانة عجيبة..بس مسكينه ماتت وخلفت ايتام وراها
):
تعابيرج لها طعمها الخاص
دمت بدفء وعذوبة
ابدا
:)
مرحبـــــا
والله على الكلام الي نقراه ما في كلمه توفي الا يعطيج العافيه واذ سمحتي ابي طلب انشالله ما ترديني ابي شعر عن وحده............خاينه
من زمان مو داش عندج الله يسامحج بس
:))
جذى تكسرين بخاطر الصغيرة وتسوين لها هالقصة :)
بس قعدت اقرى القصيدة لو كانت مو من ذبانة قلت ميخالفة:)
بس كل ما اتذكر الذبانة وقاعدة فى بيت الشعر والقهوة والقدوع جدامها وتقصد
واخر شى تركب الزهيوي
( الخيل مالها) اقول الصراحة فيلم سيريالى
:)
يعطيج العافية
ابدعتي
الفكره روعه
وترجمة الموقف اروع
وايد ضحكت على هالبيت
كانك تبي شوفه فأنا أقول مسطول
فعلا امبراطوره
والله يا امبراطوره احترت شاقول
مدري الغلط منكم والا بي آنا
هذي ابو عيالها بالحيل ازعول
وانتي وريما من بديتو اللعانه
ذبانه مصريه ومتفطره فوول
والثاني زوجها احساسه خانه
قلبج كبير وطيبة فعل وقول
عديها هالمرّه على شاني انا
:)
zZzZzZzZzZ
zzzZZZZZZ
ZZZZZZZZZZZZ
اما ريم صج حكايه والله ،،الحين تذبح الذبانه وتبجي عليها؟؟؟
:)
بعد عياره البنات شلون صايره؟
اخ منها اخ
ابدعتي كعادتج يا امبراطوره
ولكم باك
منوره ياهانم
الحمد لله على السلامة اخيتي الغالية
ازاي مصر؟؟
من حظ هالذبانة اللي خلت الامبراطورة تشعر عليها
واحنا ربعج عمرج ما شعرتي فينا !!؟
:)
تو ما نورت المدونات بعودتج
الحمدلله على السلامه ^-^
وعليه عالذبانه ..
بس ما عليه محد يموت قبل يومه :P
و الشعر ما شاء الله ما شاء الله
ابداع من انامل مبدعه
صح السانج وابداع مابعده ابداع وردج على الذبابه رد امبراطوري مكسو باحرف مذهبه ,,,
تسلم اناملج يالغاليه ماعندي كلام اقوله اكثر
SHAHAD :
هلا شهوووده الغاليه بعد عمري والله انا اللي اشتقتلكم اكثر ياقلبي
وزين انها ضحكتج هذا اهم شي اني قدرت اكتب شي يدخل الفرحه في قلوبكم فديتج ^_^
فراوله:
مساء الخير يا وجه الخير
مساء خاص لغاليتي فراوله
الله يسلمج ياقلبي والحمدلله وناستي اكنملت يوم رديتلكم انت حبايبي
تسلمين وانتي الطعم والحلى كله ^_^
S.W.A.T :
مرحبتين يا هلا
الله يعافيك اخوي ويشرفني وجودك وتلبية طلبك
انا عندي قصايد كثير اذا تبي اي وحده عادي بس لوتقولي مضمون الخيانه يكون احسن عشان اعطيك قصيده تناسبك
غالي والطلب رخيص :))
Mishari:
طلع النور من التنور
من طول الغيبات جاب الغنايم
الله يسامحك انت عسى ماشر لاحس ولا خبر..
ياسلام عليك انت يا مشاري كملت التمثيليه
انا حطيت الحوار وانت رسمت المشاهد عفيه عليك :))
لاتطول علينا ومشاري امانه خلك ويانه ^_^
براك:
اي والله يابراك مسطول هاهاهاها
يبي يشوف السلاح اللي ذبح مرته عشان يذبحه اهو بعد :))
مشكور ياخوي براك على تواجدك المستمر معاي عساني مانقطع منه
ودمت لي معلقآ :)
MANAF:
حي الذي يكتب على قافية اول
صاحبي مناف الصديق والمتانه
صلف المواقف مشبه الذيب مجلول
طلق الحجاج اللي فريد زمانه
صاحب كرم زيزوم ظرغام مسلول
مجد العلا ساس الوفى والتكانه
مقدر اكمل وصفكم بأجمل القول
وأصير قاصر واتمسى جبانه
ولا القصيده كلها فيك مرسول
وأسمك كريم وماتجيه الأهانه
هذه ذبابه تكرم الحين يازول
لا لاتهمك أو تفكر أمانه
أختم كلامي وأرفع الراس وأقول
مناف صديقي وللمراجل حصانه
SolaimaN:
اي والله ياسليمان شفت شلون يقتل القتيل ويمشي بجنازته؟؟
هذه ريم :)))
بس والله ترى مو عياره اهي طبعها جذي حساسه حيل وانا استغليت الموقف ^_^
يسلمووو اخوي ومنوره الديره بوجود مثلك وشرواك
وعفيه عليك انت بعد مشاري عطيتنا الألحان :)))
zzzzzzZZZZZZzzzzzzz
zzzzzzzz
ZZZZZZZZZZZZZZZZ ^_^
عثماني:
الله يسلمك اخوي عثماني
مصر حدها حلوه كعادتها ^_^
افا عليك ياعثماني اشعاري كلها فدوه لك انت بس آمر وأبشر بالمعلقات :))
تسلملي وماتقصر والمدونات منوره بوجود اصحابها يالغالي :)
Shather:
الله يسلمج حبيبتي
اي ياوخيتج محد يموت قبل يومه الله يرحمها :))
تسلمين على الكلام الحلو وذوقج الأحلى ^_*
عبدالله الظفيري:
تسلملي عبدالله وكلامك اخجلني وكفايه علي يالغالي ^_^
هههههه
قصه من جد تضحك وصح لسانك على
القصيدة
وتر:
هلا وغلا والله..
الله يسلمك وصح بدنك الحمدلله انها ضحكتكم فديتكم ^_^
قصة مأساوية والله .. نقدم التعازي لشيخ الذبان على استشهاد زوجتة أميرة الذبان إثر حادث دهس أليم .. إنا لله وإنا إليه راجعون
الحارث بن همام:
هههههههههههههههههههه
الناس يقولون اضحكتنا القصه وانا اقول فعلأ اضحكني تعليقك :)))
تقبلنا تعازيك وماتقصر يالغالي تعرف الواجب
والله يرحمها :))))))))))
عسا ماشر شهالغيبه ؟؟
وينج ماتبينين ؟؟
طمنينا عليج ؟؟
إرسال تعليق