,,, وتـحـقـق حـلـمـي بـالـرحـيـل ,,,

ودع محمد نـــور ليجهز نفسه للسفر لخطبتها من عمه

بدأ مشوار محمد بالليل ومرت الساعات حتى وصل للقصر العظيم "قصر عمه" ابو نور

محمد:

دخل عمي وهو يطالعني بنظرات غريبه وقال: أنت؟؟ قلت : ايه أنا محمد ولد أخوك المدفون تحت تربته

ماعندي أخو!!! جم مره أنا أكررها لكم؟؟ وإن مات الله يرحمه

في البدايه لمحت بعيونه نظرة حزن..لكن تراجعت وحلت مكانها نظره بلا معنى..حسيت انه في لحظه تأثر

عمي أنا أبيك في طلب..؟؟؟

قول اللي عندك أنا وقتي ثمين

تذكرت هالجمله سمعتها من قبل بس ماكنت بروحي كان ابوي معاي..والحين وينه.. توفى وانا اواجه العملاق بروحي..

تبي سياره؟؟ بيت؟؟ وظيفه؟؟

قول أنا أحب أتصدق أعمل الخير!!!؟؟

بعد كلامه تمنيت اني أصرخ بوجهه وأقول: أنسان بلا مشاعر..جبل من القسوه والجمود

أنا بخير ونعمه مو ناقصني شي..

طالع فيني بأستغراب!! أجل طلبك شنو يكون؟؟

قلت : نـــور هذا هو طلبي

أبي أتزوجها بعد أذنك

شفت بعيونه استحقار العالم كله.. ومن تكون لجل تطلب نـــور ؟؟

جـرحـنـي.. ذلـنـي.. هـزأنـي..وبالنهايه.. طـردنـي

رجعت لديرتي..كيف..وشلون..مادري

وتيلفوني طول الطريق تتردد نغماته.. آه يا نــور أنكتب علي أعيش بدونك

دخلت البيت وأنا منهار..ضايع بين عبراتي.. وبحور آلامي

أستمريت على هالحال أسبوعين..شهر

وصلتني رسالة من نـــور

" وين الوعد يا خاين العهود"

" أنا بدونك دنياي بلا مرسى"

تنهدت وقلت بداخلي: شلون قسيت عليها؟؟

دقيت على تيلفونها.. ردت علي واهي تبجي وتردد..وينك عني؟؟

محمد ليه تجافيني؟؟ وين الوعد؟؟

بجيت معها وأختلط دمعي بدمعها.. نـــور أحرموني منج.. أبعدوني عنج.. نــور ذبحوا قلبي.. وحفروا قبري

نـــور أبكي ولا أكتم بصدري آهاتي؟؟

أشكي ولا أعالج شكواي بصمتي؟؟

أنا هويتك والشاهد خالقني..

لكن حكم علينا أبوج بحكمه الظالم

وأنا عند الوعد يا نــور..ما أتركج لو تنهد جبال..او أن السما تقبل الأرض

حاولنا ننسى همنا.. وأعيش معاها مثل أول.. أعيش على صوتها وحبها..

حاولت مع عمي.. وكررت محاولاتي..وأرسلت من يتوسط لي عند السيد العظيم

لكنه كان جدار مايهتز.. وعنيد مثل الصخر

ماعندنا حل ألا إنا نتناسا هالأبو الظالم ونعيش حياتنا مثل أول

وفي يوم كلمتني نـــور ونوحها يسابق كلامها!!!

نـــور يانــــور العين شفيج؟؟؟

محمد ربي أستجاب لدعائي

شتقولين؟؟ عمي وافق نتزوج؟؟

لاااااا يا محمد أنت تعرف مستحيل يوافق

زين شنو اللجديد؟؟

اليوم عندي عيد !!!

محمد تماسك واسمعني عدل !!!

اليوم كنت بالمستشفى اسوي تحاليل من تعب كنت اشتكيه من أيام وطلعت النتيجه !!!

أنا يا محمد

نــــور تكلمي

يكفيني مافيني

أنـــا مريضه بالــسرطــان

والطبيب يقول حالتي صعبه و وصلت للشي للحرج

جمووود.. وصمت... وذهووووول

حسيت بعمري كبر 100 سنه

وأنا أحاول أسمعها... واللي قاهرني تردد وتقول ربي أستجاب لدعائي

يامحمد لاتحزن.. أفرح.. هذا الشي اللي أنا أبيه وأتمناه

محمد دنياي من غيرك مابيها.. الموت أهون علي ولا أعيش مع أنسان غيرك

أنا أبجي.. وأبجي.. ودمعي سيول.. وأهي مستانسه بالمرض

وشوي أسمع عند نـــور صوت ثاني..صوت مصدوم وماهو مصدق..كأنه صوت الجبل والعم الظالم

سكرت الخط .. وأنا في حيرتي.. مو مصدق.. أتذكر كلماتها

أفرح

يامحمد

ولاتحزن

غـبـيـه .. شلون أفرح وأهي من حياتي تروح؟؟

شلون الهنا والسعاده أعرف دربها وأهي بعيده عني؟؟

ياكثر الآهات اللي بقلبي تلوع

والهموم اللي بصدري تلوع

بعد أيام وصلني خبر سفر نـــور للخارج للعلاج مع العم المبجل الكريم

وانا أنتظر.. وأنتظر.. والأنتظار يحرق قلبي ويحرق مافيني من حياة

فكرت أجمع ما أملك وأسافر لعمري وحياتي أقضي معاها أيام العلاج

وكبرت الفكره في راسي وفعلآ ماكملت غير شهر الا وانا هناك عند نـــور حلمي الأول والأخير

وقفت عند باب غرفتها.. كان ودي أدخل بكل لهفه وشووووق وأضمها وأبجي بأحضانها

بس خفت من العم

طرقت الباب.. أنفتح الباب.. وطل منه وجه عمي.. شفته حالته عجيبه.. مو عمي اللي أعرفه

كان الدمع بعيوني كاتم على انفاسي.. عيوني اللي ترجاه أشوف نـــور

ومن دون ما أتكلم.. قال : تفضل يا ولدي

ماكنت مصدق.. بس المهم وافق

دخلت لملاكي

وأنا أجر خطواتي

هناك على السرير الأبيض.. ترقد أماني عمري.. والتعب أنهكها وبانت ملامحه عليها

ضميت يدها بيدي وكررت العهد على سمعها

ورفعت راسي لعمي.. وقلت زوجني نــــور

أنصدم من موقفي .. للحين تبيها وأهي ميته أصلآ؟؟

قلت : العمر اللي باجيلها بيكون أحلى عمر عشته

وافق عمي وقال اللي تبيه يصير

تبسمت نــــور بوهن.. وتبسمت لها.. وحسيت بأول أفراح حياتي

تم كل شي بسرعة البرق.. تزوجتها.. وهي على فراش المرض

أحتفلت بيوم عيدي معها بالمستشفى الكبير.. الأطباء والممرضات الأجانب..سمحنا لهم بالأحتفال معنا

الكل هناك يحب نــــور

بقيت معاها وأنا أصبرها على المرض ونحلم في بيتنا وسعادتنا

وصار المستشفى الكبير يردد حب محمد ونــــور

وفي منتصف ليله من الليالي.. وأنا عند نـــور سهران

سمعتها تصرخ بصوت عااااالي وهي تتقلب على فراش المرض..ومن الألم أنينها قطع قلبي

طلعت من الغرفه مثل المجنون.. أنادي الدكاتره والممرضات..الكل من حولي يركض..ويدخل الغرفه

وصراخ نــــور يتردد صداه بمسمعي

جلست أبجي في زاويه مثل طفل صغير..فقد أمه بظلمت الليل..

وشوي شوي أسمع صراخها يهدى

رفعت راسي والدكتور يطالع في عيوني

أدخل لنــــور تحتاجك

دخلت وأنا كلي تعب.. منهمك.. الحمدلله حالة الخطر زالت

بس شكل نـــور مو عاجبني.. يارب ارحمني من العذاب اللي اعيشه عالبطئ

وأرحم نـــور من آلامها المستمره

وقفت عندها.. تبسمت في وجهي وقالت تعال عندي العوار خلاص راح.. برتاح الحين

لا تبجي وأمسح دموعك.. قلت: ما أبجي أنا أنتي أرتاحي الحين

محمد تدري أني ندمت على دعواي ورجاي؟؟

ماكنت أدري أني بضمك ويتحقق حلمي ومناي..قاطعتها.. نـــور لا تكملين..نامي أنتي الحين وأنشالله باجر نتكلم على كل شي

محمد أنا أشوف الموت.. أشوفه يناديني

قلتلها يومي وعمري قبلج أنشالله .. أنتي راح تطلعين ولا نسيتي حلمنا.. نسيتي بيتنا.. نسيتي ولدنا مشاري

راح أعيش معاج العمر كله لأني أحبج وأحبج وأحبج

أنا بعد يا محمد أحبك .. بس أنتبه لنفسك.. وعيش دنياك بحب نـــور

لاتـــنــــسى ذكــــراي

سمعتها تنطق بالشهاده وترددها

لا تكفين نـــور لاتخليني والله أموت معاج

بعدها أنفاسها ما سمعتها

حركتها.. طاحت ايدها مني !!! راحت نــــور

صرخت صرخة الجريح المحروم

نـــــــــــــــــــــــــور

ناديت لكن حكم القدر أخذ مني روحي

رددت الوعد

" نـــور أنا لك حياة وممات"

وهذا أنا عايش أداوي بعدي وحرماني عن نــــور

العاشق الخسران

تذكرتك وأنا الطير الجريح مفارق الخلان

ونار البعد وفراقك تعل أقصى شراييني

أبي أعرف في غيابك ليه شوفي يمتلي دخان

وأحس أني لحالي وأقرب أصحابي حواليني

حبيبي رحت عني راضي ولا أنت زعلان

يا ليتك قلتلي قبل الفراق أنك مخليني

رحت وغابت الفرحه ورى ليل من الحرمان

ورجعت لصوتك اللي كان يملا الكون يدعيني

أثر نار الفراق صلفه دخيلك يا عظيم الشان

أنا ما عاد لي شوف على الفرقى يقديني

بعد فرقاك عشت الجرح عمر العاشق الشفقان

على باب العمر لامر لك طاري يبكيني

حبيبي تعب عيوني السهر من عاشق سهران

تعبت وطال بعدك والعمر ماعاد يمديني

غرب ضي الأمل قبل الشروق وسادت الأحزان

دروب العمر تسرق فرحتي والحزن يطويني

أنا مثل الغريق وطاري الذكرى مثل الطوفان

تزيد الجروح في قلبي وتبعدني وتدنيني

تعبت ومركبي مل السفر وضاقت به الشطآن

ولا لي غير حبك ساحل يمكن يرسيني

حصدت الدمع محصول الفراق ولوعة الهجران

إلا مني ذكرتك غرق كفوفي مطر عيني

بعد ماغرق عمري فالحزن ضاقت بي البلدان

وشفت الموت في كل الدروب وقلت أنا ويني

أنا مليت..مليت العذاب وقلبي المليان

بهم صاب من هجر الحبايب مقتل سنيني

يأست من الفرح في موسم فيه الأمل كسلان

رفعت الرايه البيضا لحزني وأرتمى فيني

عرفت أني بعد فوت الأوان العاشق الخسران

ودريت أن أصدق وعود الهوى ماعاد ترويني

رجعت بحسرتي كلي جروح مكسر الجنحان

وسال الجرح دم وشفت وجهك في شراييني

،،،،نــيــران فــي الــوجــدان،،،،

بأول أيام العمر ألتقيت فيها

من يوم شفتها قلبي اهديته لها

كنت أقرأ وأشوف عبارات وأمثال غريبه عن الحب والرومانسيه من أول نظره

كنت أضحك وأقول في نفسي : معقول حب يدوم سنين ويكون من أول نظره!!

هذه عبارات لشاب أحب فتاة..وكانت كل ماتعني الحياة بالنسبه له..

نــــور + مــحــمــد

في يوم من ايام العمر نادى الوالد محمد..وصل محمد للمجلس وجلس عند ابوه..

محمد: سم يابو محمد

الوالد: محمد انت كبرت وصرت تفهم الحال وتفهم كلامي اللي بقوله لك.. ولا تقاطعني وخلني انهي كلامي..

وأرجوك لا تلومني على اي شي فات..

أنا من كلام الوالد خفت و وقف الدم في عروقي..رفعت له نظري وقلت:آمر يا بوي أسمعك.

الوالد: أنت لك عم وأنا مقاطعه من سنين..بسبب مشاكل صارت بينا..وأنا أحس أن أيامي بدت..

تودعني..ونبضاتي في يوم راح تعلن رحيلي..

حاولت اتكلم وأقول يالله يومي قبل يومك..رفع ايده وقال: لاتنطقها..

لو أهديك ثواني عمري الباقي ولا أشوفك قبلي..

الدمع مني نزل وأنا بعمري ما بكيت..

قلت له: آمرني باللي تبيه

قال: أبي أشوف أخوي "عمك" قبل مماتي

قلت: غالي والطلب رخيص..

وأتفقنا على إنا في يوم راح نسافر لديار عمي المجهول..وفعلآ سافرنا و وصلنا للمكان اللي يسكن

فيه عمي..وبديت اتبع وصف أبوي وتعجبت شلون يعرف عنوانه؟! فضولي زاد وسألته

وقالي أخباره أتابعها يوم بيوم..ولانسيته دايم الدوم

ومن خلال الحديث قال أبوي: هنا وقف يا محمد

ولا أنا جدام قصر كبير!!!! بيت عمي

عرفت أن عمي تاجر معروف..دقينا الباب..أقصد بوابة القصر العظيم..بعد ثواني صرنا داخل بهو واسع

جلس أبوي وأنا المح في عيونه نظرات الخوف والتردد

أنتظرنا و وصل سيد وصاحب القصر..وبعد الترحيب والتحيه..لاحظت عمي يكلم أبوي في برود

سأله عني..قال: هذا ولدي محمد..

أخبار بنتك يا خوي؟؟

تعجب عمي وقال: ومن وين تعرف أن عندي بنت؟؟

رد عليه بنفس الجواب القديم

مرت دقايق يتحاورون ويتكلمون..وشوي شوي الصوت تجاوز جدران البهو الوسيع..

أبوي كان هادئ بس عمي اللي معصب

وقال: لايمكن انسى اللي سويته فيني!! قال أبوي: هذا شي قديم راح ماله داعي

وأنا يا خوي أحس مماتي قريب لا تحرمني منك باقي العمر..

حاولت أتكلم بس نظره من أبوي خلتني أتراجع عن قراري.. وبصوت حاد وبقسوة قلب قال عمي

أطـــلــــع بـــرى

أنت و ولدك ولا تحلم أني أغفر لك

ترجيت الوالد وقلت له : مكان أنهنت فيه يابو محمد مانجلس فيه ثواني

وبلا موعد مع القدر حوريه أو ملاك..دخلت المجلس وبجنون..ودموعها على الخد

وأرتمت بحضن أبوي..وبكت وقالت: عمي لاتتركنا سامح أبوي مالي أحد غيركم لا تتركنا

ومن وراها صرخه تردد صداها

نــــور أطلعي ماهو عمك..مالك بهالدنيا أحد غيري أنا

رفعت راسها الملاك وقبلت أيد أبوي وقالت : سامحني ومشت متردده تطالعنا بعيون كلها حيره

قال عمي: المقابله أنتهت وأنا وقتي مايسمح

وصلنا لبيتنا

أبوي أخذ الصمت له عنوان

وأنا أحترت بصمته

قال أبوي هذا عمك مهما صار

قلت: يبه الشي اللي مضى أكيد قوي وخطير عمي ما راح ينساه

قال: أمك المرحومه أهي اللي عمك ماراح ينساها

فمهت قصده من دون مايتكلم أكثر..أبوي تزوج أمي وعمي كان يبيها

قصه ولا في الخيال

مرت سنه وأنا طيف نور ودمعها مافارق خيالي..أصبحت بأحلامي و واقعي تتبعني

كأني لم أفارقها يوم..ياما حلمت ورسمت أيام عمري معاها..لبستها ثوب العروسه

و وقفت معها ايديني تحضن كفوفها..جبت الولد من نور وسميته مشاري..كانت كل حياتي

أعترفت لنفسي أني حبيت هالملاك

وفي ليله من الليالي

ودعني الغالي

دفنته وبكيت حالي

أعتزلت العالم من بعده

أتذكر كلامه وأعده

نسيت دنيتي

أردد كلمتي

الله يرحمك ياأغلى أنسان

مر أسبوع من وفاته وأنا داخل أسواري..دق تيلفوني..قمت متثاقل أشوفه..رقم غريب!!يالله أزعاج هالعالم

قطيته..سمعت النغمه جديد.. قلت مالك ألا ترد

الووو..هلا محمد..كان اللي يتكلم بنت..قلت: نعم من معاي؟ قالت: أنا نــــور

رددت أسمها بصدري وبقلبي ألف مره

وهي تردد: لاتقول نسيتني..قلت: ماعاش من ينساج..عظم الله أجرك وأعذرني على التأخير

قلت: عاذرج والله يجزاج خير

محمد أنت تعبان؟

قلت : لأ لكن مانمت ألا ساعات..قالت: أتركك تنام ترتاح.. فمان الله

ومن التعب والفرحه بنفس الوقت نمت وكأني دهر مو نايم.. صحيت على نغمة التيلفون..رديت عليه وقلت نعم..سمعت صوتها وهي تردد خوفتني عليك..يومين وأنا أحاول أخذ أخبارك..أخذت وعطيت معاها بالكلام..وتكررت المكالمات بيني وبينها..ضمتني فيها نور بحب وحنان..عوضتني عن سنين حرماني..صارت تعرف وقت نومي وكل شي..صارت حياة محمد نـــور... وفي يوم أعترف لها بحبي المكتوم..نور النفس ضاقت من الأنتظار..والقل تعب مثل الجسد..وهو يحاول يصبر ويجاهد الروح..سمعت همسها وهي تقول: محمد يا دفى قلبي وضماه أسمعك.. نــور أنا أحبج

أحب صدى صوتج وضحكتج.. أشتاقلج.. نور علمتيني معنى العشق..من سنه مرت من أول ما شفتج..أبتدت أول أيام عمري..

محمد... قلت: لبيه.. قالت : أحبك.......وأخـــيـــــرآ

ترجم حروف الغلا

وأنثر الورد على جبل الوفا

وغرد مع الطير

وسابق الريح

وأعزف ألحان الشوق

تصالح مع أمواج البحر

وتغنى مع شمس الأصيل

وأنسى كل الهموم

وأذكر كلمة أحبك يوم غادرت من شفاة نــــــــور

نور أنا أوعدك أني لك حياة وممات.. أوعدك .. أنا باجر مسافر..سمعت شهقه من صدرها!!! وين؟؟

قلت مسافر لدياركم أبي أحقق حلمي وأترجمه للواقع..أنا جاي أخطبك من عمي..ردت علي: خايفه

كل شي ينتهي..قلت أنا وعدت أني لك حياة وممات..ودعتها وجهزت نفسي

راح يتحقق حلم محمد؟؟

ولا يمنعه عناد وحقد أبوها؟؟

][][ شكرآ عبدالله الظفيري ][][

" عبدالله الظفيري صديق بمعنى الكلمة "

أتشرف يا عبدالله بمعرفتك الغاليه..

أشكره على تجديد البلوق الرائع.. واهو بعد اللي عرفني على عالم البلوقات والتدوين.. لأني ماكنت اعرف اي شي عنهم ولا سمعت فيهم..
و وجودي اليوم اهو بفضل عبدالله اللي علمني على كل شي.. وصراحه ماقصر سوالي البلوق الأول وجدده لي الحين..

مهما أقول ما أوفي حقك يالغالي....

" فكل الشكر والإمتنان لك عبدالله "

""عــنــدمــا تــهزنــا الــذكــرى""

أن تشتاق الى انسان ما وتفقد إحساسك الجميل تجاهه..

وتأخذك خطواتك الى طرقاته..وتزور مكان جمعك

يومآ فيه..وتقف فوق أرض كانت مسرح اللقاء به..

فلا تعرفك الطرقات..ولا يتذكرك المكان..فيؤلمك

أكتشاف أن أطلالك لم تعد أطلالك...!!!!!!!!!!!!

هناك كثير من القرارات التي نتخذها فـي حياتنا..بعضها يكون صحيح والبعض الآخر خاطئ..ولكن مالذي يدفعنا لإتخاذ هذا القرار؟؟


مالذي يجبرنا على سلوك طريق على الرغم من معرفتنا بأنه صعب وليس بالسهوله تخطيه؟؟ هل هي رغبات النفس؟؟


هل هو عناد التفكير؟؟ أم هو طريق لمحو آثار طريق آخر؟؟!!





بقولكم سالفه صارت مع وحده من زميلات المراهقه واللي ليمالحين معاي"


"ربي يخليها لي" :)


هالبنت تعرفت على واحد وكان عمرها 15 سنه "صغيره طبعآ" وكانت في 2 ثانوي.. المهم حبته حب مو طبيعي..


(لأنه أول أنسان في حياتها)


صار كل شي بالنسبه لها..وفت له وأخلصت لدرجه مو طبيعيه..والله كان يمرونها الشباب ويتحرشون فيها واهي عادي ولا همها!!


ولما نسألها ليش هالبرود؟؟ تقول: والله العظيم أن الولد يمر من يمي ولا أحس أنه ولد!! أحس أنه بنت ما أشعر تجاهه بأي شي..


شعوري كله مع فلان "حبيبها طبعآ " ومن ناحية الولد هم اهو بعد يموت فيها شلون؟؟كان كل شي تبيه مجاب بسرعه دون اي تردد.. وكان حتى بدراستها يساعدها..لأن طموحها كان دخول الجامعه..بس اهو يقول لا ما راح تدخلين لأن أهلج ما يرضون..هالكلام خلا عندها مثل التحدي..والأصرار على دخول الجامعه..وفعلأ كملت البنت الثانويه ونجحت وجابت نسبه تدخلها الجامعه وقدمت وقبلوها :)


زاد تعلق الولد فيها بشكل فضيع واهي نفس الشي ..وصارت بينهم غيره لأبعد الحدود..من صوب الولد..بس هالغيره بدأت تضايق البنت شويه..لأنه قام يمنعها من الطلعه والدخله ومن العزايم والأعراس.. حتى من القعده مع رفايجها بالجامعه!!! كله عشان تقعد معاه اهو بس..


كلمته مره مرتين ان الشي اللي قاعد يسويه غلط .. وكل شي له حدود..وانها الحين كبيره مو مثل اول .. الحين تعرف الصح من الغلط..تقوله: يرضيك اقعد بالجامعه بروحي بدون رفايج ولا شي؟؟ أنا صارلي بالجامعه 3 سنوات وأنا ماتعرفت على اي بنت!! كله عشان انت ماتزعل.. ماتفكر فيني عاد انا شويه؟؟انا اللي تركت العالم وقلت انت كافيني..مابي شي بس بالجامعه لازم اعرف بنات يساعدوني بالمحاضرات والامتحانات..واهو مو راضي... طبعآ اهي تعرف بنات قليله كانت تكلمهم بالخش والدس "انا منهم" :)


البنت عندها اختها اكبر منها..وتعرف واحد.. والواحد هذا عنده ولد اخته يدرس بالجامعه.. طبعآ اختها كل ما تهاوشت مع حبيبها راحت تشكي عند ولد اخته..والبنت "رفيجتي" ماكانت تحب هذا اللي بالجامعه..بالرغم من انها ما شافته ولا كلمته..بس تقول ليش يوقف ضد خاله؟؟ المفروض مايطلع اسراره برى لو انها اختي..


على يوم البنت طلعت مع اختها وراحوا للجامعه..ولا هذا الولد جدامهم !! وقفت اختها بالسياره وكالعاده تشكيله من خاله..جان تنزل رفيجتي وتستأذن قالت عندي محاضره..الولد اعجب فيها..وقال لأختها بكلمها..فالوقت هذا كانت البنت متهاوشه مع حبيبها..و وصلت الأمور بينهم لحد الأنفصال..لأنه صار مريض نفسيآ..خلاص فوق ما اهو مانعها من اهلها ورفايجها ..قام يمنعها من دراستها!!لما تقوله بذاكر يصارخ ويقول لأ بكلمج !!
قالتلها أختها: الولد يبيج وقامت تمدح فيه وبأصله وحسن تعامله وخلقه..وافقت البنت بلحظه كان عقلها فيها غايب.. لأنها ماكانت تبي تعيش الجو اللي كانت تعيشه مع الأول " حكره ونجره" المهم كلمت الولد الثاني.. ضحك وسوالف..لقت معاه حريه مطلقه..واستانست أنها خلاص مافيه شي ممنوع عندها وصارت تعرف بنات بالجامعه شكثر وقامت عادي تتأخر وتطلع مع رفيجاتها..


" بأعتقادها أنها ملكت الكون والحياة اللي تحلم فيها كل بنت "


بالوقت هذا رد الحبيب الأول بس خلاص البنت ماتبيه لقت السعاده مع الثاني.. قالتله: خلاص مابيك !!!


طبعآ أنجن الولد.. وللعلم صارلهم مع بعض 10 سنوات " جد مو غشمره" شلوت تضيع عشر سنوات من عمري؟؟!! وقام يسب ويهدد.. ويقول لو شنو ما تتركيني..والبنت خلاص ماتبي هالعلاقه عافتها..قام الولد يدق عليها ويروح يوميآ لبيتهم ويلحقها وين ما تروح..حتى بالجامعه قام يروحلها وينطرها عند محاضراتها..والبنت توهقت خافت يشوفها حبيبها الثاني ويسأل هذا منو؟؟وبنفس الوقت حبيبها الأول يسأل بعد: هذا منو؟؟


تشتت البنت وصارت تغيب وتخربطت درجاتها..و وقفت قيدها كورس كامل..بس المضايقات مستمره ما تغيرت..طبعآ نوعية هالمضايقات ان حبيبها الأول يبيها ترد مثل قبل واهي تقوله خلاص انا هالعلاقه عفتها مابيها..


والحبيب الثاني مايدري شنو الطبخه..بدأ الكورس الثاني.. وداومت البنت..ونفس الشي قام يجيها الاول بالجامعه..مالقت البنت جدامها ألا انها تفاتح حبيبها الثاني بالسالفه..بس شقالتله؟؟


قالت هذا واحد اعرفه وصارلي سنتين قاطعه عنه بس اهو الحين راد ماتدري شنو تسوي؟وقاعد يضايقني..


قالها عادي خليه يولي.. واذا شفتيه بالجامعه قوليلي.. قالت اوكي واتفقت مع حبيبها .. وقالت له: اذا دقيت ومارديت عليك معناها انه ماسكني تعال بالمكان اللي دايما نتلاقى فيه.. وكان فيه مكان دايما يقعدون فيه.. قالها اوكي..وفعلآ صارت السالفه.. طلعت البنت من المحاضره ولا هذا الحبيب جدامها.. قالها امشي لا افضحج واخذ جهازها منها.. وبنفس الوقت دق الثاني لأن وقت المحاضره خلص.. جان يرد عليه الاول .. سكر الثاني الخط وراح بسرعه للمكان اللي قالتله تعال فيه.. قامت البنت وقالت للأول تعال فيه مكان صاد عن الناس نقعد فيه ونتفاهم ..وصل الثاني للمكان ولقاهم موجودين حبيبته واللي يضايقها على قولتها..قال الثاني للأول: انت شنو تبي من البنت مو خلاص انتهت العلاقه من سنتين؟!!! جان يضحك الأول والتفت للبنت وقالها : انتي مفهمته جذي؟؟ توهقت البنت..قال الثاني: انا اكلمك مالك شغل بالبنت.. جان يقوم الاول ويمسك البنت من ايدها حيل وقال هذه لي انا واذا فيك خير اخذها مني!!


وصارت مشاده بالكلام جان يروح الثاني قال: انا اجيب الأمن الحين..طبعا اهو مو رايح يجيب الأمن الا ينحاش.. والبنت في حالة صدمه.. شلون يتخلى عنها بهالوضع؟؟!!


نادتله: تعال والاول ماسك ايدها يقولها امشي يالله .. والثاني ولا همه رايح وخلاها!!!


تحسفت البنت انها خلاص انتهت حياتها ماكسبت لا الاول ولا الثاني اللي تخلى عنها..


.. قالها الأول : ها شفتي شلون بأضعف موقف خلاج؟ وانا اللي اسوي كل شي عشان اردج وانت مو راضيه.. ليش شسويتلج؟ عشان اني احبج واخاف عليج؟..عشان اني اغير عليج حتى من الهوى؟..عشان انج تدرين اني احبج حب ولا واحد راح يحبج مثله؟..اتمنى في يوم تحسين شكثر حاولت اشتريج وارضيج بكل اللي تبينه بس انت بعتيني.. و ليته عشان واحد يستاهل..عشان واحد اهم شي عنده عمره ولا انتي راح وتركج.. وتركها وخلاها..


بس البنت رغم كل اللي صار وتحب الثاني.. اللي ردلها وقام يتأسف ويحلف انه رايح يجيب الأمن ولما وصل ماحصلها بالمكان..


المهم ماطول عليكم.. راح الحبيب الأول " 10 " سنوات وظل الحبيب الثاني "4" سنوات وقامت البنت تشوف الفرق بينهم.. شلون كان الاول يعاملها ... حب صادق..خوف صادق.. مداراه..يعاملها كشرف يحافظ عليه..


اما الثاني..حب عصري.. حب شبابي..حب اخذ وعطاء..عمره ما قالها كلمة لأ ..الكلمه اللي انهت حياتها اللي فاتت عشانها..تتمنى الحين تسمعها..


صارت تمر عليها مواقف لها "ذكـــرى" ولما تتذكرها..تهتز فيها عشر سنوات من عمرها..


البنت مقتنعه انها خلاص لايمكن ترد للأول .. لأنها فعلأ محته من بالها.. ماتبيه.. وتبي الثاني.. وتحبه لي وقتنا هذا..


" ماتقدر تستغني عنه "


رغم وجود بعض العيوب فيه اللي تتقاضى عنها عشان تستمر حياتهم مع بعض..


والسؤال: هل القرار اللي اتخذته بأنهاء علاقتها وبداية علاقه جديده صحيح؟


هل من الممكن ان تهتز بنا الذكرى وتعود الى واقع اتهيناه؟


هل الذكرى تعيد ماقد هدمناه في حياتنا؟

"صـمـت الـلــــيل"

بين صمت الليل وسطور الورق....

في ظلام صار لأفكاري طريق....

ذابت الأنوار والشمع أحترق....

والدقايق تمضي و وقتي يضيق....

وشفت نفسي ضايع بهم وأرق....

شفت واقع حالتي صارت حريق....

حالتي مثل الذي مات بغرق....

كان يغطس لجل ينقذ له غريق....

ودمتم سالمين :)

"الإمبراطوره"