قصتي مع الذبابه

ذبابه توفيت من غير ذنب :(

صج قصة غريبة بس كتبتها اليوم وأبي أهدي البوست هذا لبنت أختي وحبيبتي وروحي

ريــوووومـــه

هذا أول يوم لنا بالقاهره.. قالت ريم نبي نطلع قلتلها من صجج !! اليوم راحه ماكو طلعه

المهم من باجر قمنا نتكشخ نستعد للطلعه وقعدت بغرفتي وطبعآ ريم معاي ملاومتني وين ماروح لأنها حبيبتي

قعدت بالغرفه على المرايه عشان اتمكيج.. وريم يمي كالعاده بس هالمره كان معانا طرف ثالث حده مزعج بالنسبه لريم

الطرف الثالث كانت الذبانه "الذبابه" تفتر فوقنا وكله تحط عالمرايه كنها حالفه ماتروح لأي مكان

ريم تضايقة منها وانا اضحك اقولها حرام اتركيها البنت تبي تتمكيج مثلنا تبي تطلع تسهر معانا

وريم مو ريضيه تبي تذبحها تقول يا أنا يا الذبانه هذه اليوم

فقامت ريم تدور اي وسيلة لقتل الذبابه المسكينه مالقت الا انها ترسل الشغاله للبقاله تحت وتشتري المضرب وفعلآ جابته الشغاله

وتحقق حلم رين وقتلت الذبابه بغفله منها عندما كانت تتمكيج معاي :(

قلت لريم حرام عليج الحين وراها عيال راح يسألون وين امنا وراح ينطرونها وانتي حرمتيهم من امهم

بقولكم شغله عن ريم.. عمرها 13 سنه وحساسه لأبعد درجه يعني أي كلمه تنزل دمعتها سيدا

فأنا أستغليت الموقف وقلت لو أنها أمج يا ريم ترضين أحد ياخذها منج؟؟

قالت لأ أذبحه

قلت خلاص أنتي الحين حرمتي عائله من أمهم

هذه الأم ياريم حرام عليج والله حرام

ولما حسيت أن دمعت ريم خلاص موقادره عينها تشيلها وراح تنزل

ولا فيه ذبانه ثانيه

قلت ريم بسرعه هذا زوجها جانا يبي ينتقم منا

جان تقعد ريم وتضحك :))

قلت الله يعيني الحين عباله ان أنا اللي ذبحتها وراح ينتقم مني بس مالي شغل بقول أنتي اللي ذبحتيها

قالت خلاص إذا قال ليش حوليه عندي وأنا أتصرف معاه أخليه بسرعه يروح يلحق مرته :))

بعد فتره من الصمت قالت ريم: خاله ليش ماتكتبين قصيده عن الذبانه وموقف زوجها منا؟؟

عشان جذي اول مره بحياتي أكتب قصيده عن حشره بس كله لخاطر ريوووومه أتمنى أنها تعجبها وتعجبكم أنتم قرائي

وتعطوني رايكم فيها ^_^

القصيده بيني انا والذبابه وزوجها

الذبابه

عزي لقلب أبد ماكمل الحول

يجزاه من لوعات روحي الجبانه

ياذالبشر ماني أنا وحش أو غول

ولا الزير سالم يوم أمسى بحانه

أصلي ذبابه وأن تعديت مسؤل

الله خلق خلقه وأحسن بنانه

الثار حق وقاتل النفس مقتول

والزير صانه وأمرؤ القيس صانه

زوجــهــــــــــــا

وهذه ذبابه تنتخي فيا وتقول

يابو عيالي لاتخلي تهانه

لا لاتصالح تترك الثار مهبول

وتصفق كفوفك وتلتفت للخيانه

ماتطيب لي خمره وذالسيف مسلول

يحرم عليه الغمد للشان شانه

لا واحياتي عقبها مالها جول

لين آخذ بثاري أو ألحق بنانه

واعيني اللي لم ترى مثلها زول

لو لم يحلق في سمايا ريانه

معجل الجنحان فارع الرمش والطول

محدب الأعضاء والذيل ثانه

وهوكر صوته لافت الناس بذهول

خلاص كافي ماتحمل إهانه

أنـــــــــــــــا

لحظه تريت وأسمع الهرج والقول

أنا الإمبراطوره ولو تبي الثار عانه

محد أخذ ثاره بلا علم معجول

كن عنده حصانه ومالي حصانه

كنا ثلاثة مابنا حد معذول

وكنا نتزين في امان الله أمانه

أنا والذبابه وهذه الريم الجفول

على المرايه وللذبابه شطانه

ماتحملت ريما حركات مخبول

قامت بسرعه تسحب سلاح فانه

معرف المصنع ماسك يديه مفتول

عنده لياقه وللمرانه مرانه

كانك تبي شوفه فأنا أقول مسطول

أبد تدور للمآسي عزانه

وأنت تبي ثارك؟؟ لحول لحول

عليك في ريما تزيد الأهانه

وهذا كلامي وكثرة الهرج بتزول

والزين من يعرف لسانه حصانه

^.^ بــدأت الإجــازة ^.^

الى أحبائي فالله

الي من جمعني بهم البلوق دون سابق ميعاد

الي كل من اتشوق لزيارته

الي كل من اسعدني بحضوره

أستأذنكم لقضاء وقت الإجازه في القاهره

وأنشالله ما أصادف اللي صادفهم اخوي عثماني

ويكون سايقنا عاطف بعيد كل البعد عن سايق عثماني فوده :))

لذلك استودعكم الله

وأشوفكم على خير ^_^

!!!<< شـيـئ غـريــب >>!!!

صباح ومساء الخير لأعز ناسي :))

اليوم بقولكم سالفة ايميل وصلني من احد الأخوان جزاه الله خير ماقصر على الكلام اللي ذكره..

يقول الأخ بالإميل :

مرحبا الامبراطوووره.. شلونج ..

مواضيعج حلوه ماعليها بس حبيت ابلغج ان الناس ماتوقف على البلوقات بس

بالعكس تزور اماكن ثانيه وتشوف

واذا انتي ماعدلتي الخطأ اللي تسوينه من الحين صدقيني راح تخسرين كل اللي يزورونج!!

انتي مواضيعج كلها نسخ بنسخ .. ليش ماتكتبين شي من عندج من إبداعج انتي؟؟

لأن كل اللي كاتبته انا محصله بأماكن كثيره

طيب يا أخي العزيز أنا برد عليك وبفهمك من خلال البلوق وجدام اللي يزوروني كلهم عشان الكلام يصير واضح

أولآ أنا سميت نفسي بالبلوق إمبراطورة أشعاري

تدري ليش لأني أحب أكتب شعر ولما أقولك أكتب شعر معناها إني أنا اللي أكتب ما أنسخ

وإذا كانت أفكاري اللي داخل راسي منسوخه الله يعين صار كل شي منسوخ

ثانيآ انا لما بنزل قصيده احب اكتب عليها موضوع او قصه

عشان اوضح معنى القصيده

وابي ابلغك ان المواضيع والقصص انا اللي كاتبتها بعد من راسي مو ناسختها :))

لأن انا داشه بالبلوق بقول اللي عندي افيد واستفيد

ماله داعي انسخ وانسب الشي لي أنا

المهم يالغالي اتمنى تقولي انت وين شايف مواضيعي مع اني متأكده انها موجوده بس ببلوقي

والكل اللي يزورني ويقرا اللي كاتبته اذا منسوخ راح يبين ويقولي ان كلامج منسوخ واذا شايفه بمواقع ثانيه هم بعد يقولي

وتسلمون لي وتسلملي طلتكم على عساني مانحرم منها

^_^

شعري أبد ماكان وهم وتخاريف

ولا حتى لفلان ينسب إليــا

ماهمني حكي البشر لتواصيف

يكفي أنا بكيفي خيالي بديــا

حرن كفخ شعري تعلى المشاريف

ماجابلي غير الجزيله هنيــا

وأعبر أنا بحري بليا مجاديف

ماهمني موجن تلاطم عليـــا

وشعري بقدي ولو فيه تحريف

أبسلطه الخاطر وأسميه غيـــا

وأكتب الإمبراطوره كذا من باب تعريف

وماهمها قول البشر خط إديـــا

اللي خلق روس الجبال المناكيف

خالق الإمبراطوره ماعليها أذيــا

ومافيه داعي أخطف الهرج والزيف

هـذا بعـض مايـمـلي خيـالي عليـــا

وربــي وأمـانه مابقـالي تحاسـيف

عـلى الـذي قضـى حيـاتـه جنيـــا

وأخـتــم بـقـولي ومابـقـالي مكـالـيف

كـن الشعــر وقــف ودق لــي تحيـــــا

~~رســالـة حــب مكتــوبـة عـلـى سـطـحـنــا~~

إلى ذلك الحب الخالد.. الذي أعطيت فيه أكثر مما أخذت منه

إلى من قطفني ثمرة ورماني بعدما أكل مني الزهرة

إلى الذي عاد بعدما جرب غيري واستفاد

ربما تكون تلك نهاية حب عاثر..لكنها بداية عقل صادق

التقيا صدفة..وفرقتهم الخدعة

التقيا فتحابا

لم تجد بشرآ مثل حلاوة كلامه, وهو لم يجد من يوازيها جمالأ وأخلاصآ من نساء زمانه

لقد كانت هي العطية والضحية..وكان هو السارق والجاني بالقضية

لقد بذلت له من العطاء الكثير الكثير

وكان منه الجشع الذي أستبدل الأدنى بالذي هو خير

والآن بعدما بحث ولعب مع النساء ورجع وقد طالت به الأيام..

عاد إليها عودة التائبين

لكنها نظرة إلى عودته نظرة الخائفين

لقد كان هو العابث.. وهي الحب الصادق

الآن الآن تعود؟؟؟؟

الآن عرفت مقداري بعدما جربت أنسان ثاني؟؟؟

ليست هذه الكذبه الأولى لكم يابني الرجال..فالخداع عندكم دائمآ مقدمآ على الحب والعفاف

لأنكم تعطون الحب من أجل الوصول للجنس..ونحن بني حواء نعطي الجنس كي نحصل على حفنة من الحب

لكن أين هو ذاك الحب؟؟

لقد أصبحت أنت أطلال جسد..وأصبحت أنا أطلال روح.. لأنك جسد بالي وأنا الحب الباقي

أين من عينيك ذلك البريق؟؟ أين ذلك الحب الذي وعدتني به من سنين؟؟

الأن تعود؟؟

لكن أنا لن أقبل بهذه الإعادة.. لأنني لست آلة

بـل كــنــت ولا أزال صــاحبــة الـجـــلالــة.. صـــاحــبــة الجـــلالــة

هلا باللي بعد غيبه رجع يسأل عن احبابه

يحسب أن الشجر وقت الجفاف غصونه تليني

ترى كثر الجفاف ويالجفاف يذبل الغابه

يخليها غصون يابسه عقب البساتيني

حبيبي شفت دربك عن هوانا أقفت ركابه

وأنا نفسي عزيزه ماتبعك ليا صرت جافيني

إذا قلت أحبج من حقيقه قلت قولة كذابه

لكن قولي أجامل خفوق لك يناديني

إذا عمر الزمن مايشغل المخلص عن أحبابه

وش اللي ألزمك في هذه الفتره تخليني؟؟

ترى مافيه داعي للوصل وأنقطعت أسبابه

مادام أني لقيت اللي عن أطيافك يخاويني

ختمنا باب من صوب الخيانه وأنقفل بابه

وفتحنا باب من صوب الوفا للي وافيني

لكن أرجع للي عذلك وصرت ترضابه

عساه يجدد العشره معاك وارجوك تنساني

أنا قلبي رحوم وعادته مايجحد أحبابه

ولـكـن عـيـبـه إنـه بـالـهــوى مـايـجـمـع أثـنـيـنــي

][][ لــكــل غــلــطــه إســتــفــاده][][

لــيــس عــيــبــآ أن تــزل قــدمــك

فــتــســقــط مــن الــقــمــه الــى الــحــضــيــض

ولــكــن الــعــيــب أن تــذهــلــك الــســقــطــه

فــتــبــقــى حــيــث أنــت

دون أن تــحــاول

الـــــــصـــــــعــــــــود

,,, وتـحـقـق حـلـمـي بـالـرحـيـل ,,,

ودع محمد نـــور ليجهز نفسه للسفر لخطبتها من عمه

بدأ مشوار محمد بالليل ومرت الساعات حتى وصل للقصر العظيم "قصر عمه" ابو نور

محمد:

دخل عمي وهو يطالعني بنظرات غريبه وقال: أنت؟؟ قلت : ايه أنا محمد ولد أخوك المدفون تحت تربته

ماعندي أخو!!! جم مره أنا أكررها لكم؟؟ وإن مات الله يرحمه

في البدايه لمحت بعيونه نظرة حزن..لكن تراجعت وحلت مكانها نظره بلا معنى..حسيت انه في لحظه تأثر

عمي أنا أبيك في طلب..؟؟؟

قول اللي عندك أنا وقتي ثمين

تذكرت هالجمله سمعتها من قبل بس ماكنت بروحي كان ابوي معاي..والحين وينه.. توفى وانا اواجه العملاق بروحي..

تبي سياره؟؟ بيت؟؟ وظيفه؟؟

قول أنا أحب أتصدق أعمل الخير!!!؟؟

بعد كلامه تمنيت اني أصرخ بوجهه وأقول: أنسان بلا مشاعر..جبل من القسوه والجمود

أنا بخير ونعمه مو ناقصني شي..

طالع فيني بأستغراب!! أجل طلبك شنو يكون؟؟

قلت : نـــور هذا هو طلبي

أبي أتزوجها بعد أذنك

شفت بعيونه استحقار العالم كله.. ومن تكون لجل تطلب نـــور ؟؟

جـرحـنـي.. ذلـنـي.. هـزأنـي..وبالنهايه.. طـردنـي

رجعت لديرتي..كيف..وشلون..مادري

وتيلفوني طول الطريق تتردد نغماته.. آه يا نــور أنكتب علي أعيش بدونك

دخلت البيت وأنا منهار..ضايع بين عبراتي.. وبحور آلامي

أستمريت على هالحال أسبوعين..شهر

وصلتني رسالة من نـــور

" وين الوعد يا خاين العهود"

" أنا بدونك دنياي بلا مرسى"

تنهدت وقلت بداخلي: شلون قسيت عليها؟؟

دقيت على تيلفونها.. ردت علي واهي تبجي وتردد..وينك عني؟؟

محمد ليه تجافيني؟؟ وين الوعد؟؟

بجيت معها وأختلط دمعي بدمعها.. نـــور أحرموني منج.. أبعدوني عنج.. نــور ذبحوا قلبي.. وحفروا قبري

نـــور أبكي ولا أكتم بصدري آهاتي؟؟

أشكي ولا أعالج شكواي بصمتي؟؟

أنا هويتك والشاهد خالقني..

لكن حكم علينا أبوج بحكمه الظالم

وأنا عند الوعد يا نــور..ما أتركج لو تنهد جبال..او أن السما تقبل الأرض

حاولنا ننسى همنا.. وأعيش معاها مثل أول.. أعيش على صوتها وحبها..

حاولت مع عمي.. وكررت محاولاتي..وأرسلت من يتوسط لي عند السيد العظيم

لكنه كان جدار مايهتز.. وعنيد مثل الصخر

ماعندنا حل ألا إنا نتناسا هالأبو الظالم ونعيش حياتنا مثل أول

وفي يوم كلمتني نـــور ونوحها يسابق كلامها!!!

نـــور يانــــور العين شفيج؟؟؟

محمد ربي أستجاب لدعائي

شتقولين؟؟ عمي وافق نتزوج؟؟

لاااااا يا محمد أنت تعرف مستحيل يوافق

زين شنو اللجديد؟؟

اليوم عندي عيد !!!

محمد تماسك واسمعني عدل !!!

اليوم كنت بالمستشفى اسوي تحاليل من تعب كنت اشتكيه من أيام وطلعت النتيجه !!!

أنا يا محمد

نــــور تكلمي

يكفيني مافيني

أنـــا مريضه بالــسرطــان

والطبيب يقول حالتي صعبه و وصلت للشي للحرج

جمووود.. وصمت... وذهووووول

حسيت بعمري كبر 100 سنه

وأنا أحاول أسمعها... واللي قاهرني تردد وتقول ربي أستجاب لدعائي

يامحمد لاتحزن.. أفرح.. هذا الشي اللي أنا أبيه وأتمناه

محمد دنياي من غيرك مابيها.. الموت أهون علي ولا أعيش مع أنسان غيرك

أنا أبجي.. وأبجي.. ودمعي سيول.. وأهي مستانسه بالمرض

وشوي أسمع عند نـــور صوت ثاني..صوت مصدوم وماهو مصدق..كأنه صوت الجبل والعم الظالم

سكرت الخط .. وأنا في حيرتي.. مو مصدق.. أتذكر كلماتها

أفرح

يامحمد

ولاتحزن

غـبـيـه .. شلون أفرح وأهي من حياتي تروح؟؟

شلون الهنا والسعاده أعرف دربها وأهي بعيده عني؟؟

ياكثر الآهات اللي بقلبي تلوع

والهموم اللي بصدري تلوع

بعد أيام وصلني خبر سفر نـــور للخارج للعلاج مع العم المبجل الكريم

وانا أنتظر.. وأنتظر.. والأنتظار يحرق قلبي ويحرق مافيني من حياة

فكرت أجمع ما أملك وأسافر لعمري وحياتي أقضي معاها أيام العلاج

وكبرت الفكره في راسي وفعلآ ماكملت غير شهر الا وانا هناك عند نـــور حلمي الأول والأخير

وقفت عند باب غرفتها.. كان ودي أدخل بكل لهفه وشووووق وأضمها وأبجي بأحضانها

بس خفت من العم

طرقت الباب.. أنفتح الباب.. وطل منه وجه عمي.. شفته حالته عجيبه.. مو عمي اللي أعرفه

كان الدمع بعيوني كاتم على انفاسي.. عيوني اللي ترجاه أشوف نـــور

ومن دون ما أتكلم.. قال : تفضل يا ولدي

ماكنت مصدق.. بس المهم وافق

دخلت لملاكي

وأنا أجر خطواتي

هناك على السرير الأبيض.. ترقد أماني عمري.. والتعب أنهكها وبانت ملامحه عليها

ضميت يدها بيدي وكررت العهد على سمعها

ورفعت راسي لعمي.. وقلت زوجني نــــور

أنصدم من موقفي .. للحين تبيها وأهي ميته أصلآ؟؟

قلت : العمر اللي باجيلها بيكون أحلى عمر عشته

وافق عمي وقال اللي تبيه يصير

تبسمت نــــور بوهن.. وتبسمت لها.. وحسيت بأول أفراح حياتي

تم كل شي بسرعة البرق.. تزوجتها.. وهي على فراش المرض

أحتفلت بيوم عيدي معها بالمستشفى الكبير.. الأطباء والممرضات الأجانب..سمحنا لهم بالأحتفال معنا

الكل هناك يحب نــــور

بقيت معاها وأنا أصبرها على المرض ونحلم في بيتنا وسعادتنا

وصار المستشفى الكبير يردد حب محمد ونــــور

وفي منتصف ليله من الليالي.. وأنا عند نـــور سهران

سمعتها تصرخ بصوت عااااالي وهي تتقلب على فراش المرض..ومن الألم أنينها قطع قلبي

طلعت من الغرفه مثل المجنون.. أنادي الدكاتره والممرضات..الكل من حولي يركض..ويدخل الغرفه

وصراخ نــــور يتردد صداه بمسمعي

جلست أبجي في زاويه مثل طفل صغير..فقد أمه بظلمت الليل..

وشوي شوي أسمع صراخها يهدى

رفعت راسي والدكتور يطالع في عيوني

أدخل لنــــور تحتاجك

دخلت وأنا كلي تعب.. منهمك.. الحمدلله حالة الخطر زالت

بس شكل نـــور مو عاجبني.. يارب ارحمني من العذاب اللي اعيشه عالبطئ

وأرحم نـــور من آلامها المستمره

وقفت عندها.. تبسمت في وجهي وقالت تعال عندي العوار خلاص راح.. برتاح الحين

لا تبجي وأمسح دموعك.. قلت: ما أبجي أنا أنتي أرتاحي الحين

محمد تدري أني ندمت على دعواي ورجاي؟؟

ماكنت أدري أني بضمك ويتحقق حلمي ومناي..قاطعتها.. نـــور لا تكملين..نامي أنتي الحين وأنشالله باجر نتكلم على كل شي

محمد أنا أشوف الموت.. أشوفه يناديني

قلتلها يومي وعمري قبلج أنشالله .. أنتي راح تطلعين ولا نسيتي حلمنا.. نسيتي بيتنا.. نسيتي ولدنا مشاري

راح أعيش معاج العمر كله لأني أحبج وأحبج وأحبج

أنا بعد يا محمد أحبك .. بس أنتبه لنفسك.. وعيش دنياك بحب نـــور

لاتـــنــــسى ذكــــراي

سمعتها تنطق بالشهاده وترددها

لا تكفين نـــور لاتخليني والله أموت معاج

بعدها أنفاسها ما سمعتها

حركتها.. طاحت ايدها مني !!! راحت نــــور

صرخت صرخة الجريح المحروم

نـــــــــــــــــــــــــور

ناديت لكن حكم القدر أخذ مني روحي

رددت الوعد

" نـــور أنا لك حياة وممات"

وهذا أنا عايش أداوي بعدي وحرماني عن نــــور

العاشق الخسران

تذكرتك وأنا الطير الجريح مفارق الخلان

ونار البعد وفراقك تعل أقصى شراييني

أبي أعرف في غيابك ليه شوفي يمتلي دخان

وأحس أني لحالي وأقرب أصحابي حواليني

حبيبي رحت عني راضي ولا أنت زعلان

يا ليتك قلتلي قبل الفراق أنك مخليني

رحت وغابت الفرحه ورى ليل من الحرمان

ورجعت لصوتك اللي كان يملا الكون يدعيني

أثر نار الفراق صلفه دخيلك يا عظيم الشان

أنا ما عاد لي شوف على الفرقى يقديني

بعد فرقاك عشت الجرح عمر العاشق الشفقان

على باب العمر لامر لك طاري يبكيني

حبيبي تعب عيوني السهر من عاشق سهران

تعبت وطال بعدك والعمر ماعاد يمديني

غرب ضي الأمل قبل الشروق وسادت الأحزان

دروب العمر تسرق فرحتي والحزن يطويني

أنا مثل الغريق وطاري الذكرى مثل الطوفان

تزيد الجروح في قلبي وتبعدني وتدنيني

تعبت ومركبي مل السفر وضاقت به الشطآن

ولا لي غير حبك ساحل يمكن يرسيني

حصدت الدمع محصول الفراق ولوعة الهجران

إلا مني ذكرتك غرق كفوفي مطر عيني

بعد ماغرق عمري فالحزن ضاقت بي البلدان

وشفت الموت في كل الدروب وقلت أنا ويني

أنا مليت..مليت العذاب وقلبي المليان

بهم صاب من هجر الحبايب مقتل سنيني

يأست من الفرح في موسم فيه الأمل كسلان

رفعت الرايه البيضا لحزني وأرتمى فيني

عرفت أني بعد فوت الأوان العاشق الخسران

ودريت أن أصدق وعود الهوى ماعاد ترويني

رجعت بحسرتي كلي جروح مكسر الجنحان

وسال الجرح دم وشفت وجهك في شراييني

،،،،نــيــران فــي الــوجــدان،،،،

بأول أيام العمر ألتقيت فيها

من يوم شفتها قلبي اهديته لها

كنت أقرأ وأشوف عبارات وأمثال غريبه عن الحب والرومانسيه من أول نظره

كنت أضحك وأقول في نفسي : معقول حب يدوم سنين ويكون من أول نظره!!

هذه عبارات لشاب أحب فتاة..وكانت كل ماتعني الحياة بالنسبه له..

نــــور + مــحــمــد

في يوم من ايام العمر نادى الوالد محمد..وصل محمد للمجلس وجلس عند ابوه..

محمد: سم يابو محمد

الوالد: محمد انت كبرت وصرت تفهم الحال وتفهم كلامي اللي بقوله لك.. ولا تقاطعني وخلني انهي كلامي..

وأرجوك لا تلومني على اي شي فات..

أنا من كلام الوالد خفت و وقف الدم في عروقي..رفعت له نظري وقلت:آمر يا بوي أسمعك.

الوالد: أنت لك عم وأنا مقاطعه من سنين..بسبب مشاكل صارت بينا..وأنا أحس أن أيامي بدت..

تودعني..ونبضاتي في يوم راح تعلن رحيلي..

حاولت اتكلم وأقول يالله يومي قبل يومك..رفع ايده وقال: لاتنطقها..

لو أهديك ثواني عمري الباقي ولا أشوفك قبلي..

الدمع مني نزل وأنا بعمري ما بكيت..

قلت له: آمرني باللي تبيه

قال: أبي أشوف أخوي "عمك" قبل مماتي

قلت: غالي والطلب رخيص..

وأتفقنا على إنا في يوم راح نسافر لديار عمي المجهول..وفعلآ سافرنا و وصلنا للمكان اللي يسكن

فيه عمي..وبديت اتبع وصف أبوي وتعجبت شلون يعرف عنوانه؟! فضولي زاد وسألته

وقالي أخباره أتابعها يوم بيوم..ولانسيته دايم الدوم

ومن خلال الحديث قال أبوي: هنا وقف يا محمد

ولا أنا جدام قصر كبير!!!! بيت عمي

عرفت أن عمي تاجر معروف..دقينا الباب..أقصد بوابة القصر العظيم..بعد ثواني صرنا داخل بهو واسع

جلس أبوي وأنا المح في عيونه نظرات الخوف والتردد

أنتظرنا و وصل سيد وصاحب القصر..وبعد الترحيب والتحيه..لاحظت عمي يكلم أبوي في برود

سأله عني..قال: هذا ولدي محمد..

أخبار بنتك يا خوي؟؟

تعجب عمي وقال: ومن وين تعرف أن عندي بنت؟؟

رد عليه بنفس الجواب القديم

مرت دقايق يتحاورون ويتكلمون..وشوي شوي الصوت تجاوز جدران البهو الوسيع..

أبوي كان هادئ بس عمي اللي معصب

وقال: لايمكن انسى اللي سويته فيني!! قال أبوي: هذا شي قديم راح ماله داعي

وأنا يا خوي أحس مماتي قريب لا تحرمني منك باقي العمر..

حاولت أتكلم بس نظره من أبوي خلتني أتراجع عن قراري.. وبصوت حاد وبقسوة قلب قال عمي

أطـــلــــع بـــرى

أنت و ولدك ولا تحلم أني أغفر لك

ترجيت الوالد وقلت له : مكان أنهنت فيه يابو محمد مانجلس فيه ثواني

وبلا موعد مع القدر حوريه أو ملاك..دخلت المجلس وبجنون..ودموعها على الخد

وأرتمت بحضن أبوي..وبكت وقالت: عمي لاتتركنا سامح أبوي مالي أحد غيركم لا تتركنا

ومن وراها صرخه تردد صداها

نــــور أطلعي ماهو عمك..مالك بهالدنيا أحد غيري أنا

رفعت راسها الملاك وقبلت أيد أبوي وقالت : سامحني ومشت متردده تطالعنا بعيون كلها حيره

قال عمي: المقابله أنتهت وأنا وقتي مايسمح

وصلنا لبيتنا

أبوي أخذ الصمت له عنوان

وأنا أحترت بصمته

قال أبوي هذا عمك مهما صار

قلت: يبه الشي اللي مضى أكيد قوي وخطير عمي ما راح ينساه

قال: أمك المرحومه أهي اللي عمك ماراح ينساها

فمهت قصده من دون مايتكلم أكثر..أبوي تزوج أمي وعمي كان يبيها

قصه ولا في الخيال

مرت سنه وأنا طيف نور ودمعها مافارق خيالي..أصبحت بأحلامي و واقعي تتبعني

كأني لم أفارقها يوم..ياما حلمت ورسمت أيام عمري معاها..لبستها ثوب العروسه

و وقفت معها ايديني تحضن كفوفها..جبت الولد من نور وسميته مشاري..كانت كل حياتي

أعترفت لنفسي أني حبيت هالملاك

وفي ليله من الليالي

ودعني الغالي

دفنته وبكيت حالي

أعتزلت العالم من بعده

أتذكر كلامه وأعده

نسيت دنيتي

أردد كلمتي

الله يرحمك ياأغلى أنسان

مر أسبوع من وفاته وأنا داخل أسواري..دق تيلفوني..قمت متثاقل أشوفه..رقم غريب!!يالله أزعاج هالعالم

قطيته..سمعت النغمه جديد.. قلت مالك ألا ترد

الووو..هلا محمد..كان اللي يتكلم بنت..قلت: نعم من معاي؟ قالت: أنا نــــور

رددت أسمها بصدري وبقلبي ألف مره

وهي تردد: لاتقول نسيتني..قلت: ماعاش من ينساج..عظم الله أجرك وأعذرني على التأخير

قلت: عاذرج والله يجزاج خير

محمد أنت تعبان؟

قلت : لأ لكن مانمت ألا ساعات..قالت: أتركك تنام ترتاح.. فمان الله

ومن التعب والفرحه بنفس الوقت نمت وكأني دهر مو نايم.. صحيت على نغمة التيلفون..رديت عليه وقلت نعم..سمعت صوتها وهي تردد خوفتني عليك..يومين وأنا أحاول أخذ أخبارك..أخذت وعطيت معاها بالكلام..وتكررت المكالمات بيني وبينها..ضمتني فيها نور بحب وحنان..عوضتني عن سنين حرماني..صارت تعرف وقت نومي وكل شي..صارت حياة محمد نـــور... وفي يوم أعترف لها بحبي المكتوم..نور النفس ضاقت من الأنتظار..والقل تعب مثل الجسد..وهو يحاول يصبر ويجاهد الروح..سمعت همسها وهي تقول: محمد يا دفى قلبي وضماه أسمعك.. نــور أنا أحبج

أحب صدى صوتج وضحكتج.. أشتاقلج.. نور علمتيني معنى العشق..من سنه مرت من أول ما شفتج..أبتدت أول أيام عمري..

محمد... قلت: لبيه.. قالت : أحبك.......وأخـــيـــــرآ

ترجم حروف الغلا

وأنثر الورد على جبل الوفا

وغرد مع الطير

وسابق الريح

وأعزف ألحان الشوق

تصالح مع أمواج البحر

وتغنى مع شمس الأصيل

وأنسى كل الهموم

وأذكر كلمة أحبك يوم غادرت من شفاة نــــــــور

نور أنا أوعدك أني لك حياة وممات.. أوعدك .. أنا باجر مسافر..سمعت شهقه من صدرها!!! وين؟؟

قلت مسافر لدياركم أبي أحقق حلمي وأترجمه للواقع..أنا جاي أخطبك من عمي..ردت علي: خايفه

كل شي ينتهي..قلت أنا وعدت أني لك حياة وممات..ودعتها وجهزت نفسي

راح يتحقق حلم محمد؟؟

ولا يمنعه عناد وحقد أبوها؟؟